Apirilaren 7an zabalduko da B1, B2, C1 eta C2 mailako HABE azterketak lehen deialdian egiteko matrikula-epea, apirilaren 14ra arte. Izen-ematea Internet bidez bideratuko da, www.habe.euskadi.eus atarian ikasleen sarbidean klik eginez, horretarako ezarritako epearen barruan. Bertan sartzeko, norberak dituen erabiltzailea eta pasahitza baliatuko dira:

-Erabiltzailea: Norberaren NANaren zenbakia, letrarik gabe.

-Pasahitza: Lehen aldiz sartzean, norberaren NANaren zenbakia (letrarik gabe) erabili behar da. Hurrengo pantailan pasahitza aldatzea eskatuko da. Handik aurrera, pasahitz hori baliatu beharko da. Ahaztuz gero, eta HABEk ikasle horren helbide elektronikoa ezagutzen badu, pasahitza berreskuratu aukera erabili ahal izango da. Bestela, euskaltegira edo HABEra jo daiteke.

Ondoren, jo Indarrean dauden azterketa-deialdietara – Deialdia eta maila – Matrikula egin/ikusi. Matrikula-inprimakia bete eta grabatu.

Onartuen zerrenda apirilaren 15ean argitaratuko da.

Parte hartzeko baldintzak

Ondorengo bi baldintza hauek bete beharko ditu azterketariak B1, B2 eta C1 mailako gaitasuna egiaztatzeko ohiko deialdietan parte hartu ahal izateko:

1. HABEren Erregistroan inskribatuta dauden euskaltegi edo euskararen autoikaskuntzarako zentro homologaturen batean matrikulatuta egon izana 2015eko ekainaren 1etik aurrera hasitako ikastaro batean.
2. Azterketariak 2014ko urriaren 1etik aurrera hasitako ikastaroetan, lau hizkuntza-trebetasunetan, egiaztatu nahi duen mailari dagokion atalasea iritsia izan beharko du euskaltegian, 2016ko martxoaren 21erako, lehen deialdian; eta 2016ko irailaren 8rako bigarren deialdiari dagokionez.

C2 mailako azterketari dagokionez,  hemen ikus ditzakezu baldintzak eta informazio guztia.

B2 mailako azterketaren egutegia:

• Entzumeneko eta irakurmeneko probak euskaltegian: Maiatzaren 6an eta 7an
• Entzumeneko eta irakurmeneko emaitzak: Maiatzaren 11n
• Idazmeneko proba BECen: Maiatzaren 14an, 9:00etan
• Idazmeneko emaitzak: Ekainaren 16an
• Mintzameneko proba BECen: Ekainaren 23an, 24an eta 25ean
• Emaitzak: Uztailaren 12an

B2 mailako azterketaren informazio guztia hemen ikus dezakezu.

C1 mailako azterketaren egutegia:

• Entzumeneko eta irakurmeneko probak euskaltegian: Maiatzaren 6an eta 7an
• Entzumeneko eta irakurmeneko emaitzak: Maiatzaren 11n
• Idazmeneko proba BECen: Maiatzaren 14an, 11.30ean
• Idazmeneko emaitzak: Ekainaren 16an
• Mintzameneko proba BECen: Uztailaren 1ean eta 2an
• Emaitzak: Uztailaren 12an

C1 mailako azterketaren informazio guztia hemen ikus dezakezu.

Aldaketak B1 mailako azterketan 

Aurten aldaketak izango dira B1 mailako azterketan. 2016ko ohiko lehen deialdiko egutegia hau da:

• Mintzameneko proba euskaltegian: Ekainaren 7an, 8an eta 9an
• Idazmeneko proba euskaltegian: Ekainaren 13an eta 14an
• Entzumeneko eta irakurmeneko probak euskaltegian: Ekainaren 22an
• Emaitzak: Uztailaren 12an

C2 mailako azterketaren informazio guztia hemen ikus dezakezu.

Maiatzeko lehen asteetan HABEko azterketaren lehen deialdiko B2, C1 eta C2 mailako lehen probak egingo dira; C2ko entzumen eta irakurmen probak, maiatzaren 3an, eta maiatzaren 6an eta 7an B2 eta C1 mailako entzumen eta irakurmen probak, euskaltegian. Idazmen proba, berriz, maiatzaren 14an, larunbata, egingo da BECen (Barakaldo). Gabriel Aresti euskaltegiko ikasleek, azterketa gela barruan prestatu ez ezik, gelatik kanpoko hainbat aukera ere badute, hilero-hilero, euskara hobeto eta modu naturalagoan ikasteko, gozatu bitartean. Hauek dira hil honetako kultura ekarpenak:

Hasteko, euskal dantzekiko hileroko hitzordua izango dugu, Juan Antonio Urbeltzen eskutik, Urbeltzen Dantza Ganbaran, maiatzaren 4an, asteazkena, 20:00etatik aurrera Kafe Antzokian. Anima zaitez eta parte har ezazu euska dantzak giro ederrean gozatzeko saio ireki honetan, dantzari trebea izan ala ez.

Maiatzaren 16an, aldiz, Karlos Zurutuza kazetariaren bisita izango dugu, 11:00etan Kafe Antzokian. Zurutuzak Irak, Iran, Afganistan, Kurdistan, Siria, Pakistan eta Libian egin du lan, besteak beste, eta “Gerraren `beste´ aurpegiak” hitzaldiaren bidez, ohiko hedabideetatik iritsi ohi ez zaizkigun aurpegiak emango digu ezagutzera.

Maiatzaren 25ean, asteazkena, hileroko beste hitzordu klasikoa dugu: Lagun Artean Kantari. Anje Duhalderekin eta euskal kantagintzarekin gozatzeko saio irekia dugu hau. Lagunarteko giroan abestu eta ederto pasatzeko aukera izango duzu 20:00etatik aurrera Kafe Antzokian.

Maiatzaren 27an, ostirala, Udaberri Jaiaren txanda izango da, ederto pasatzeko abagunea Algara konpartsaren eskutik. Urtero garai honetan ospatzen dugun festa dugu hau, udari begira motorrak berotzen joateko, gure konpartsa ezagutarazteko eta jakina, euskaraz era naturalean egiteko. Goizetik gauera lehiaketak, jolasak, bazkaria Kafe Antzokian… Laster informazio gehiago emango dizugu.

Eta hilari bukaera ezin hobea emateko, maiatzaren 31n “Etxekoak” antzezlanaren azken emanaldiak ikusteko aukera izango dugu, goizeko 11:00etan zein arratsaldeko 19:30ean Kafe Antzokian. Jon Gerediagak idatzia eta Ander Lipusek zuzendua, “Etxekoak” lanak Kristiane Etxaluz, Javier Barandiaran, Maika Etxekopar eta Ander Lipus ditu protagonista.

Gabriel Aresti euskaltegian irakasle aritzeko lan poltsa osatzen ari gara. Gurekin lan egin nahi baduzu, mesedez, bidali zure curriculuma lanbila@gabrielaresti.com helbidera.

Ekainera heldu gara jada. Horrek esan nahi du batzuk ikasturtea bukatzear daudela, eta beste batzuk, berriz, orain hasiko direla euskara ikasten eta gozatzen, udarekin batera; izan ere, Gabriel Aresti euskaltegian, uda ekainaren 1ean hasten da.

Edonola ere, haiei guztiei, ohiko eskolez gain, euskara ikasten jarraitzeko eta euskal kultura hobeto ezagutzeko proposamen interesgarriak eskaini nahi dizkiegu. Hala, hasteko, ekainaren 6an, astelehena, “Gaur irekiko ditu ateak” (2015) dokumentalaren emanaldia edukiko dugu, arratsaldeko 7:30etik aurrera Kafe Antzokian. Eriz Zapirainek zuzendua, dokumental honek lehenengo euskarazko egunkariaren sorrera pozgarri eta itxaropentsua dauka hizpide.

Ekainaren 7an, aldiz, Kike Amonarriz soziolinguista, umorista eta aurkezleak “Euskal heritarron patologia linguistikoak: automedikaziorako gida” hitzaldia eskainiko digu. Goizeko 11:00etan zein arratsaldeko 6:00etan izango dugu hitzordua, Kafe Antzokian.

Ekainaren 8an, asteazkena, euskal dantzekiko hileroko hitzordua izango dugu, Juan Antonio Urbeltzen eskutik, Urbeltzen Dantza Ganbaran, 20:00etatik aurrera Kafe Antzokian. Anima zaitez eta parte har ezazu euska dantzak giro ederrean gozatzeko saio ireki honetan, dantzari trebea izan ala ez.

Ekainaren 15ean, berriz, ikasturteko azken zinema-emanaldia izango dugu, Zine Txokoan, eta “Amama” (2015) filma ikusteko aukera izango dugu. Gainera, pelikularen zuzendari Asier Altunaren bisita ere izango dugu, goizeko 11:00etatik aurrera Kafe Antzokian.

Ekainaren 21ean, asteartea, UEUren eskutik, “Jai ereduak genero ikuspegitik: begirada antropologiko bat Euskal Herriko errealitateari” hitzaldia eskainiko digu Margaret Bullen antropologoak, goizeko 11:00etan. Arratsaldean, aldiz, “Adin txikiko transexuala” hitzaldia eskainiko digute “Adin txikiko transexuala” Xandra Garcia Moreno sexologoak eta Bea Sever Egaña Chrysallis elkarteko kideak, 16:15ean Kafe Antzokian.

Ekainaren 22an, asteazkena, ikasturteko azken Lagun Artean Kantari saioan elkartuko gara, hilero bezala 20:00etatik aurrera Kafe Anztokian, Anje Duhalderekin giro ederrean gure kantak abesteko.

Eta ikasturteari agur esateko, ekainaren 24an, euskaltegiko jaia ospatuko dugu. San Juan gaua aurreko gauean ospatu arren, guk egun bat luzatuko dugu aurten, eta gure ohiturak eta gure historia gogoratuz, gau magikoan murgilduko gara iluntzetik aurrera 24an berriz ere.

Bestalde, gogoratu ekainean, uztailean, abuztuan eta irailean ere ikastaroak ditugula: trinkoak, barnetegiak Bilbon zein Bakaikun… Eta hil hauetan zehar hainbat kultura-proposamen izaten jarraituko dugula. Anima zaitez gurekin euskara ikastera eta gozatzera udan ere!

2016ko udan ere aukera ugari ditugu helduontzat, euskara ikas dezazun, euskaraz gozatuz. Ikastaro trinkoak, barnetegiak Bakaikun (Nafarroa) eta Bilbon (loa etxean), autoikaskuntza… Anima zaitez!

Egin matrikula hemen.

Deskontuak

Urtero bezala, deskontu bereziak eskaini nahi dizkizugu, Gabriel Aresti euskaltegiko ikaslea izan bazara ikasturte honetan zehar edota langabezian bazaude, hurrengo ikastaroetan: eguneroko 5 orduko ikastaro trinkoetan, bi hileko eguneroko 3 orduko ikastaroetan eta bi asteko barnetegietan, Bakaikun zein Bilbon. Gure ikaslea izan bazara %10eko deskontua izango duzu; langabezian bazaude %10eko deskontua izango duzu; eta bi ezaugarriakbetetzen badituzu, %15eko deskontua izango duzu.

Udako gure ikastaroetan matrikulatzen bazara (ekainean, uztailean edo abuztuan), %5eko deskontua izango duzu udako beste hil batean matrikulatzean (uztailean, abuztuan edo irailean).

2016-17 ikasturterako ere deskontuak

Gure ikaslea izan bazara ikasturte honetan edo 2016ko udan, 2016-17 ikasturterako matrikula ekainaren 24a baino lehenago eta ordainketa irailaren 9a baino lehenago eginez gero, %5eko deskontua izango duzu.

Informazio guztia, gure bulegoan (Done Bikendi, 2  4.solairua 48001 Bilbo. Telefonoa: 944 237 591).

OHARRA: Deskontuak izan ahal izateko, matrikula bulegoan egin beharko duzu.

EGA edo Euskarazko Gaitasun Agiria eskuratzeko azterketaren 2016ko bigarren deialdia irailean hasiko da eta matrikulaldia ekainaren 27tik uztailaren 11ra -eguerdiko 12ak arte- izango da. Lehen proba, atariko proba alegia, irailaren 17an, larunbata, izango da. Zure asmoen artean EGA lortzea baduzu, Gabriel Aresti euskaltegian azterketa prestatzeko ikastaro bereziak eskaintzen dizkizugu uda osoan zehar: ikastaro trinkoak, barnetegiak Bilbon zein Bakaikun… Atariko proba, idazlanak, berridazketak eta beste egiteko guztiak behar bezala lantzeko eta gainditzeko. Matrikula zaitez gure bulegoan (Done Bikendi, 2. 4.solairua 48001 Bilbo) edo hemen klikatuta.

EGA azterketara aurkezteko matrikula egiteko eta horren inguruko informazio guztia kontsultatzeko, hemen klikatu.

Hainbat gobernu erakundek diru-laguntzak ematen dituzte euskara ikasteagatik. Aurten Bizkaiko Foru Aldundiko Euskara eta Kulturako Foru Sailak Euskara Eskura Txartela ekinbidea jarri du martxan. Euskara Eskura Txartela euskara ikasten duten eta 2015-2016 ikasturtean A1, A2 edo B1 euskara-mailetako bat gainditu duten bizkaitarrek eskura dezakete; hala, deskontu-bonua izango dute hurrengo ikasturterako.

2016ko uztailaren 1etik 22ra bitartean eskatu beharko du txartela ikasleak, www.bizkaia.eus/euskaratxartela webgunean. Irailetik aurrera lortu ahalko du. www.bizkaia.eus/euskaratxartela webgunean adieraziko da horretarako egun zehatza, iraileko lehen astean.

Euskara Eskura Txartela 2016-17 ikasturterako matrikulazio-epea hasten denetik 2016ko urriaren 14ra arte erabili ahalko du ikasleak.

Euskaltegietako ikasleentzako HABEren dirulaguntzak

Bestalde, urtero bezala, HABEk ere ikasleentzako diru-laguntzak eskainiko ditu. Diru-laguntza hauetarako eskabideak egiteko epea 2016ko irailean izango dela aurreikusten da. Ondorengo bi baldintza hauek bete beharko ditu ikasleak laguntza hori jasotzeko:

• HABEren Erregistroan euskaltegi edo euskararen autoikaskuntzarako zentro homologatu bezala sailkatutako batean matrikulatuta egotea 2015eko martxoaren 27tik 2016ko abuztuaren 31ra bitarteko epealdian.
• 2015/2016 ikasturtean HABEren mailaren bat edo baliokideren bat egiaztatu izana. HABEren mailak egiaztatzeari dagokienez, 2015eko bigarren deialdian eta orain indarrean dagoen 2016ko lehen deialdian mailaren bat egiaztatu izana.

Udaleko diru-laguntzak

Bizkaiko udal askok diru-laguntzak eskaintzen dituzte euskara ikasteagatik. Zure udaletxera hurbildu eta informa zaitez. Bilboko Udalaren kasuan, guraso eta tutoreentzako diru-laguntza eskaintzen dute.

2016-17 ikasturtean euskara ikasi nahi baduzu, HABEko edo bestelako azterketa ofizialak prestatzeko asmorik badaukazu, oposaketak egin behar badituzu… etor zaitez Gabriel Aresti euskaltegira! 2016-17 ikasturterako matrikula zabalik dago jada: urritik aurrera, maila guztiak eta ordutegi eta ordu-kopuru eskaintza zabala daukagu euskara ikasi eta gozatzeko erraztasun guztiak eduki ditzazun. Gainera, langabetuek %10eko deskontua izango dute ikastaro guztietan. Informa zaitez gure bulegoan (Done Bikendi, 2. 4.solairua 48001 Bilbo) eta anima zaitez!

Irailaren 16an zabalduko da B1, B2, C1 eta C2 mailako HABE azterketak bigarren deialdian egiteko matrikula-epea, irailaren 22ra arte. Izen-ematea Internet bidez bideratuko da, www.habe.euskadi.eus atarian ikasleen sarbidean klik eginez, horretarako ezarritako epearen barruan. Bertan sartzeko, norberak dituen erabiltzailea eta pasahitza baliatuko dira:

-Erabiltzailea: Norberaren NANaren zenbakia, letrarik gabe.

-Pasahitza: Lehen aldiz sartzean, norberaren NANaren zenbakia (letrarik gabe) erabili behar da. Hurrengo pantailan pasahitza aldatzea eskatuko da. Handik aurrera, pasahitz hori baliatu beharko da. Ahaztuz gero, eta HABEk ikasle horren helbide elektronikoa ezagutzen badu, pasahitza berreskuratu aukera erabili ahal izango da. Bestela, euskaltegira edo HABEra jo daiteke.

Ondoren, jo Indarrean dauden azterketa-deialdietara – Deialdia eta maila – Matrikula egin/ikusi. Matrikula-inprimakia bete eta grabatu.

Onartuen zerrenda irailaren 23an argitaratuko da.

Parte hartzeko baldintzak

Ondorengo bi baldintza hauek bete beharko ditu azterketariak B1, B2 eta C1 mailako gaitasuna egiaztatzeko ohiko deialdietan parte hartu ahal izateko:

1. HABEren Erregistroan inskribatuta dauden euskaltegi edo euskararen autoikaskuntzarako zentro homologaturen batean matrikulatuta egon izana 2015eko ekainaren 1etik aurrera hasitako ikastaro batean.
2. Azterketariak 2014ko urriaren 1etik aurrera hasitako ikastaroetan, lau hizkuntza-trebetasunetan, egiaztatu nahi duen mailari dagokion atalasea iritsia izan beharko du euskaltegian 2016ko irailaren 8rako bigarren deialdiari dagokionez.

C2 mailako azterketari dagokionez, hemen ikus ditzakezu baldintzak eta informazio guztia.

Egutegiak

Oraingo honetan, B2 mailako proba guztiak BECen (Barakaldo) egingo dira.
Hau da ohiko bigarren deialdiko egutegia:

• Irakurmeneko eta idazmeneko probak, BECen: urriaren 22an, 9:00etan
  
• Irakurmeneko eta idazmeneko emaitzak: azaroaren 17an
• Entzumeneko eta mintzameneko probak, BECen: azaroaren 24an, 25ean eta 26an
• Emaitzak: abenduaren 14an

B2 mailako azterketaren informazio guztia hemen ikus dezakezu.

C1 mailako azterketari dagokionez, hau da egutegia:

• Entzumeneko eta irakurmeneko probak euskaltegian: urriaren 14an eta 15ean
• Entzumeneko eta irakurmeneko emaitzak: urriaren 19an
• Idazmeneko proba, BECen: urriaren 22an, 12:00etan
• Idazmeneko emaitzak: azaroaren 17an
• Mintzameneko proba, BECen: abenduaren 2an eta 3an
• Emaitzak: abenduaren 14an

C1 mailako azterketaren informazio guztia hemen ikus dezakezu.

Aldaketak B1 mailako azterketan 

Bigarren deialdian aldaketak izango dira B1 mailako azterketan. 2016ko ohiko bigarren deialdiko egutegia hau da:

• Irakurmeneko eta idazmeneko probak, BECen: urriaren 22an, 16:00etan
  
• Irakurmeneko eta idazmeneko emaitzak: azaroaren 17an
• Entzumeneko eta mintzameneko probak, BECen: azaroaren 24, 25 eta 26an
• Emaitzak: abenduaren 14an

C2 mailako azterketaren informazio guztia hemen ikus dezakezu.

HABEren diru-laguntzak eta bestelakoak

HABEk argitara eman du 2015/2016 ikasturtean HABEren euskara-mailak edo horien baliokideak gainditu dituzten ikasleei dirulaguntzak emateko deialdia egiten duen Ebazpena.

Halaber, gogoratu aurten Bizkaiko Foru Aldundiko Euskara eta Kulturako Foru Sailak Euskara Eskura Txartela ekinbidea jarri duela martxan. Euskara Eskura Txartela euskara ikasten duten eta 2015-2016 ikasturtean A1, A2 edo B1 euskara-mailetako bat gainditu duten bizkaitarrek eskura dezakete; hala, deskontu-bonua izango dute hurrengo ikasturterako. Informa zaitez www.bizkaia.eus/euskaratxartela webgunean.

Horrez gain, Bizkaiko udal askok diru-laguntzak eskaintzen dituzte euskara ikasteagatik. Zure udaletxera hurbildu eta informa zaitez. Bilboko Udalaren kasuan, guraso eta tutoreentzako diru-laguntza eskaintzen dute.

Eta laguntzarik behar baduzu, jo ezazu gure bulegora (Done Bikendi, 2. 4. solairua 48001 Bilbo. Telefonoa: 944 237 591).

Hemen da 2016-17 ikasturte berria, eta Gabriel Aresti euskaltegian ikastaro-eskaera zabala prestatu dugu aurten ere euskara eroso, erraz eta disfrutatuz ikas dezazun: ordu 1 eta erdi, 2, 3, 4 eta 5 orduko klaseak, eguneroko ikastaroak edo astean 2 edo 3 egunetan, asteburuetan, autoikaskuntza…; goizeko 7:30etik gaueko 22:00etara doazen ordutegien artean hautatzeko aukera, eta urrats guztiak. Zure helburu eta beharretara egokitutako ikastaroak ditugu; azterketa ofizialak eta hizkuntza eskakizunak prestatzeko ikastaro espezifikoak ez ezik, euskara zure erritmoa ikasteko edo mintzamena soilik lantzeko ikastaroak ere eskaintzen ditugu, besteak beste. Gainera, langabetuek deskontuak izango dituzte ikastaro guztietan.

Halaber, eta urtero legez, ikasturte osoan zehar zure intereseko kultura programazio berezia eskaini nahi dizugu, ohiko eskoletan ikasitakoa osatzen laguntzeko asmoz eta gure kultura sakonago ezagut dezazun. Eta horrez gain, beste jarduera dinamiko batzuk, jai eta ospakizun bereziak kasu, ez dira faltako gure egutegian.

Urriko programazioa

Gabriel Aresti euskaltegiak 35 urte baino gehiago darama euskara irakasten eta euskal mundua ezagutarazten. Eta horretarako, hilero-hilero hainbat kultura proposamen eskaintzen ditugu geure ikasleek, ohiko eskolez gain, euskara era naturalean bizi eta ikasten jarrai dezaten, baita gozatu ere. Urrian eta datozen hiletan ere, beraz, musika, literatura, dantza, bertsolaritza, antzerkia, zinema, intereseko gaien inguruko hitzaldiak, mintzamenerako Kafe Solasak saioak… eskainiko dizkizugu. Hauxe da ikasturte hasiera honetako agenda oparoa:

Urtero garai honetan egiten dugun moduan, Gabriel Aresti Segurola gogoratu eta omenduz hasiko dugu urria. Izan ere, urriaren 14an beteko dira 83 urte idazlea jaio zenetik Bilbon, eta poetaren bizitza eta lanak hobeto ezagut ditzazun, euskara ikasten jarraitzen duzun bitartean, hiru proposamen ditugu egun horretarako “Harako Aresti hartaz” zikloaren baitan: alde batetik, Rafa Rueda musikariak eta Xabier Monasterio idazleak “Gabriel Arestiri gorazarre” hitzaldi musikatua ekarriko digute, goizeko 11:00etan Kafe Antzokian.

Horrez gain, “Gabriel Arestiren Bilbo” ezagutzeko parada izango dugu: Kafe Antzokitik abiatuta eta 12:00etatik aurrera, idazlearen sorlekuaz, haurtzaroaz, izan zituen erreferentzia intelektualez, lan aipagarrienez eta Euskaltzaindian izan zuen protagonismoaz hitz egingo digu Iraia Biterik literatura ibilbide honetan zehar.

Eta zikloarekin bukatzeko, “Gabrielen garaiko kantuak” irratsaio berezia eskainiko digu Pedro Elias Igartuak Bilbo Hiria irratian, eguerdiko 12:00etatik aurrera. Bilbo Hiria irratia euskara hutsez Bilbo Handirako emititzen duen irratia duzu. Bere programazioan gizarte eta kultura gaiak nabarmentzen dira eta, musika alorrean, kalitatearen eta aniztasunaren aldeko apustu irmoa egiten du. Zenbat Gara kultura elkarteak sortu zuen 1997. urtean, eta, hark bezala, euskaldunen arteko harremanak bideratzea eta euskara eta euskal kultura sustatzea du helburu Bilbo Hiria irratiak. Bilboaldean FM 96.0 frekuentzian emititzeaz gain, Internet bidez euskaldunon ahotsa mundu zabalera helarazten du Bilbo Hiriak, bilbohiria.eus webgunean. Denboraldi berriari ekiteko prest, urriaren 18an ikasturte honetarako programazioa aurkezteko ekitaldia ospatuko da Kafe Antzokian, arratsaldeko 7:30etik aurrera, Ane Zabala esatariak gidaturik. Gonbidatuta zaude.

Bestalde, urriaren 19an, asteazkena, Urbeltzen Dantza Ganbaran elkartuko gara berriz ere. Dantzan egiteko eta hurbiltzen den orori euskal dantzak hurbilarazteko hileroko saio irekia da hau. Edonork parte har dezakeen dantzen jaia. Ez da beharrezkoa dantzari trebea izatea, helburua ondo pasatuz  euskal dantza tradizionalarekin harremanetan hastea baita. Hori guztia Juan Antonio Urbeltzen zuzendaritzapean, berau folklorista ospetsua eta euskal dantzen ikerle nekaezina baitugu. Iluntzeko 8:00etan izango da hitzordua, Kafe Antzokian.

Urriaren 25ean, asteartea, mintzamena izango da protagonista, era naturalean eta dinamikoan, Kafe Solasak saioan. Egun osoan zehar, intereseko gai bat jorratzeko eta iritziak trukatzeko aukera izango duzu, euskara hobeto ikas dezazun.

Eta egun horretan bertan, hileroko beste ezinbesteko hitzordua dugu, Lagun Artean Kantari saio irekian, kantuan lagunarteko giro ezin hobean egiteko Anje Duhalde musikariaren laguntzarekin, arratsaldeko 8:00etan Kafe Antzokian.

Euskaltegia baino gehiago da Gabriel Aresti, euskara bere osotasunean eskaintzen dizulako. Ez galdu aukera! Oraindik matrikulatu ez bazara, anima zaitez eta etor zaitez Gabriel Aresti euskaltegira! Informazio gehiago nahi baduzu, jo gure bulegora (Done Bikendi, 2 4.solairua 48001 Bilbo) edo dei iezaguzu: 944 237 591.

Ongi etorri!

Euskara ahalik eta ondoen ikasteko, Gabriel Aresti euskaltegian aspalditik dakigu zein garrantzitsua den hizkuntza klasetik ateratzea, hau da, gustuko jarduerak ikasi, egin eta gozatu bitartean aritzea euskaraz, era naturalean. Badakigu, halaber, egiten ditugun jarduera horiei esker euskal kultura ezagutu eta maitatzen ikas dezakegula. Horregatik, ohiko eskolez gain, hilero-hilero kultura ekarpenak eta proposamen ludikoak eskainiko dizkizugu.

Azaroari hasiera emateko, San Martin ospatuko dugu, Algara konpartsaren eskutik, ostiral honetan, azaroak 11. Antzinako ohiturari jarraituz, baserri askotan txerria hiltzeko garaiaren hasiera da oraingoa; Etorri da San Martin eguna eta joan da txerria, dio esaera zaharrak. Guk gure estilora ospatuko dugu San Martin: euskaraz modu naturalean eginez, txistorrak eta sagardoak lagunduta. Egun osoan zehar Done Bikendin.

Bestalde, gure kulturan hain garrantzitsuak diren dantzak eta kantak ezagutu eta gozatzeko aukera izango dugu hil honetan. Alde batetik, azaroaren 16an, Euskal Ikasleen Dantzagunean elkartuko gara, egun osoan zehar, oso dantza errazak ikasteko eta ederto pasatzeko. Eta gehiago nahi badugu, egun horretan bertan hileroko hitzordua dugu Juan Antonio Urbeltzekin Urbeltzen Dantza Ganbara saioan, iluntzeko 8:00etan Kafe Antzokian. Gogoratu ez duzula dantzari trebea izan beharrik parte hartzeko. Anima zaitez!

Eta beste aldetik, abestuz bukatuko dugu azaroa. Hilaren 30ean euskal musikako klasikoak eta abesti berriak ezagutu eta kantatuko ditugu Euskara Ikasleen Kantagunean. Eta iluntzeko 8:00etan Anje Duhalderen laguntza izango dugu, Lagun Artean Kantari saioan, Kafe Antzokian.

2017an euskaraz gozatzen eta gozarazten jarraituko dugu Gabriel Aresti euskaltegian. Eta zeuk ere euskara ikasi eta gozatu nahi baduzu gurekin, hemen duzu gure ikastaro-eskaintza osoa: ikastaro trinkoak, 2 ordu edo 2 ordu eta erdikoak, astean bi edo hiru egunekoak, asteburuetakoak… Gainera, gogoratu langabetuentzat %10eko deskontua eskaintzen dugula eta hainbat diru-laguntza badaudela. Anima zaitez eta urte berri on!

Informazio gehiago nahi izanez gero edo matrikula egiteko, jo gure bulegora (Done Bikendi, 2. 4. solairua 48001 Bilbo. Telefonoa: 944 237 591). Matrikula hemen klikatuta ere egin dezakezu: matrikula egin

Gogoko tokian urtarrileko aldaparik ez. Eta guk urte berriari berrindartuta eta ilusionaturik ekin diogu, euskara gozatzen duzun bitartean arin eta ondo ikas dezazun. Horretarako, eskola dinamikoak eta hilero bezala, eskolaz kanpoko hainbat jarduera proposatuko dizugu urtarrilean ere. Hasteko, hilaren 11n, asteazkena, gure kontsumo ohiturak aztertuko ditugu Kafe Solasak saioan, era naturalean mintzamena praktikatuz, egun osoan zehar. Egun horretan bertan, iluntzeko 8:00etan, Urbeltzen Dantza Ganbara hileroko saiora ere bagaude gonbidatuta, dantzan eginez disfruta dezagun.
Urtarrilaren 18an Jakes Sarrailleten bisita izango dugu, goizeko 11:00etan Kafe Antzokian. Sarrailleten bitartez, Zuberoa ezagutuko dugu sakonago, “Zuberoako geografia, kultura eta euskalkia” hitzaldian. Eta iluntzean, hileroko beste hitzordua dugu: Lagun Artean Kantari, Anje Duhalderekin, 20:00etan Kafe Antzokian. Amaitzeko, urtarrilaren 26an, euskal musikari garrantzitsua ezagutuko dugu: Joseba Tapia. Hitzez eta doinuz bere ibilbidearen berri emango digu trikitixaren ikur den Tapiak, goizeko 11:00etan Kafe Antzokian.

Ikusten duzunez, euskaltegia baino gehiago da Gabriel Aresti, euskara ondo landu eta bere osotasunean, modu naturalean, eskaintzen dizugulako, hobeto eta motibatuago ikas dezazun. Eskerrik asko gu aukeratzeagatik!

Gabriel Aresti euskaltegiak mintzamena lantzeko eta ondo pasatzeko aukera ematen dizu urte osoan zehar Bakaikuko etxean, asteburuetako egonaldi berezietan. Ostiral gauetik igande arratsaldera arte, Gabriel Aresti euskaltegiko ikasleek zein kanpokoek euskara modu naturalean egiten dute, klaserik gabe, baina hainbat jardueraren bidez, naturaz gozatuz eta euskal kultura hobeto ezagutuz. Bakaikuko etxea era guztietako zerbitzuez ondo hornituta dagoen XIX. mendeko baserri ederra da eta Nafarroako Sakanan dago kokatuta, Aralar eta Urbasa artean.

Hauek dira 2. hiruhilekorako prezioak eta datak:

Informazio gehiago nahi izanez gero edo izena emateko, jo ezazu gure bulegora (Done Bikendi, 2. 4.solairua. 48001 Bilbo) edo telefono honetara deitu: 94 423 75 91.

Hizkuntza bat behar bezala ikasteko, ikasleak hizkuntza horretan murgildu eta zuzeneko harremanetan ibili behar du hiztunekin ohiko komunikazio egoeretan. 2017ko Aste Santuan eta Pazko Astean, Gabriel Aresti euskaltegiaren barnetegiek horretarako aukera paregabea ematen dute,  egunean 24 orduz euskaraz bizi delako ikaslea ingurune eta giro euskaldun batean, bai Bakaikun bai Bilbon. Barnetegietan, ohiko eskolak jaso eta euskara bertatik bertara bizitzeaz gain, euskal kultura ezagutzeko balio duten hainbat txango, bisitaldi gidatu eta jarduera egiten ditu ikasleak.

Bakaikun

Bilbon

Informazio gehiago nahi izanez gero edo izena emateko, jo ezazu gure bulegora (Done Bikendi, 2. 4.solairua. 48001 Bilbo) edo telefono honetara deitu: 94 423 75 91.

Otsailean sartu gara jada. San Blas opilak dastatu eta Santa Ageda abestu ostean, Inauteriak prestatzea tokatzen da, baina ez hori bakarrik; Gabriel Aresti euskaltegian mota guztietako proposamenak dakarzkizugu euskara ikasi eta goza dezazun.

Otsailaren 8an, asteazkena, euskal dantzekiko hileroko hitzordua izango dugu, Juan Antonio Urbeltzen eskutik, Urbeltzen Dantza Ganbaran, 20:00etatik aurrera Kafe Antzokian. Anima zaitez eta parte har ezazu euska dantzak giro ederrean gozatzeko saio ireki honetan, dantzari trebea izan ala ez.

Otsailaren 14an, berriz, Euskal Herri osoan zehar ospatzen diren inauteriak ulertzeko, Mikel Urbeltzek hainbat gako emango ditu “Hartzekon dantzan” hitzaldian: festa honen jatorria, zer erritu ospatzen den, pertsonaiak, zer irudikatzen duten… Izan ere, berehala ospatuko ditugu Inauteriak edo Aratusteak. Aurten ere Bilboko Konpartsek sekulako egitaraua prestatu dute udalarekin batera, otsailean 18an eta 19an hasita, eta 23tik 28ra bitartean. Adin eta gustu guztietarako jarduerak izango ditugu Bilbon, eta guk, beti bezala, Algara konpartsarekin parte hartuko dugu. Otsailaren 25ean, larunbata, 12:00etan emango diogu irekiera Jai esparruari konpartsa guztiok, Plaza Biribilean. Eta 12:30ean Done Bikendira joango gara, Urbeltzen Dantza Ganbara saio berezira. 14:30ean Kafe Antzokian bazkaldu eta bazkalostekoa egingo dugu, Txarli eta Joseluk lagunduta, “amultsuki”. Eta 16:00etatik aurrera, Mozorro Lehiaketan hartuko dugu parte. Zatoz Algara konpartsarekin!

Baina Inauterietako larunbata heldu baino lehen, beste bi hitzordu izango dugu euskaltegian, euskal musikaz gozatzeko: otsailaren 22an, asteazkena, Lagun Artean Kantari saioan elkartuko gara, hilero bezala 20:00etatik aurrera Kafe Anztokian, Anje Duhalderekin giro ederrean gure kantak abesteko.
Eta otsailaren 23an, osteguna, Txuma Murugarren musikariaren ibilbidea eta kantuak ezagutzeko aukera izango dugu.

Martxoan jarraituko dugu Gabriel Aresti euskaltegian Inauteriak ospatzen, martxoaren 3an, hain zuzen, Inaute Jaian. Eta horrez gain, Bakaikura joateko plana ere izango dugu, mintzamena lantzeko eta ondo pasatzeko asteburuetan. Eta beste proposamen asko, adi ibili!

Inaute Jai itzelaren ostean, martxoko agenda kultura ekarpenez mukuru dator. Denetik izango dugu datozen asteetan, euskara ikasten eta gozatzen jarrai dezazun.

Hasteko, aspalditik itxaroten genuen bisita: Xamar martxoaren 7an, asteartea, izango dugu “Etxea” liburu berria aurkezten. Kontzeptua osotasunean azterturik, ekonomian, kulturan, gure herriaren idiosinkrasian eragin handia du etxeak, egituratu baitu gure izaera. Garraldar ikertzaileak xehe aztertu du euskal etxea liburu honetan eta modu ulergarrian eta dinamikoan kontatzera etorriko zaigu. Goizeko 11etan eta arratsaldeko 4:30ean izango da hitzordua, Kafe Antzokiko goiko aretoan.

Martxoaren 8an, Emakumeen Nazioarteko Egunean, hausnarketarako abagunea izango dugu aurten ere, Kafe Solasak saioan. Sexismoa identifikatu eta deuseztatzeko asmoz, gure gizartean eta gure egunerokotasunean izaten ditugun jokaerak aztertuko ditugu egun osoan zehar.

Martxoaren 11n, aldiz, Hiromi Yoshida Japoniako hizkuntzalari euskaldunak eta Axen Eskalada, Arantzazu Maiz eta Maider Ibarguren aktoreek Japonian tradizio handia duen rakugoa azaldu eta antzeztu egingo digute, eguerdiko 12:30ean Kafe Antzokiko goiko aretoan.

Martxoaren 13an, “Neskatoak” dokumentala ikusteko aukera izango dugu, goizeko 11etan Kafe Antzokian. Gerraren ondoren, 1950eko hamarkadan, etxetik urrun lanera joatea egokitu zitzaion Hego Euskal Herriko jende askori. Haien artean, oharkabean igaro diren langile finei buruz hitz egingo digu dokumental honek. Emanaldiaren ondoren, gainera, Jon Abril zuzendariarekin solasaldia izango da.

Martxoaren 15ean, asteazkena, hileroko hitzordua dugu Urbeltzen Dantza Ganbaran, Juan Antonio Urbeltzen eskutik dantza egiteko saio irekian. Beti bezala, iluntzeko 8etatik aurrera Kafe Antzokian.

Martxoaren 22an, ostera, kantagintzaren eguna izango da: alde batetik Euskara Ikasleen Kantagunea izango dugu egun osoan zehar euskal kantak ikasi eta gozatzeko. Eta abesteko gogoz jarraituz gero, gonbidatuta zaude, hilero bezala, Anje Duhaldek gidatutako Lagun Artean Kantari saio irekira, iluntzeko 8etatik aurrera.

Hilabeteari bukaera emateko, martxoaren 29an “Motxilaren umea” film pedagokikoa estreinatuko da Kafe Antzokian arratsaldeko 7etan. Rita Naveirak zuzenduta, Itziar Ituño, Jose Angel Aramendi eta Maider Latatu aktoreek hartu dute parte.

Goza ezazu euskaraz eta euskal kulturaz ikasi bitartean!

Indarberrituta etorri gara oporralditik, ikasturteko azken txanpari heltzeko prest. Apirila ia-ia agortu zaigu, baina oraindik bi proposamen eskaini nahi dizugu, buelta hain gogorra egin ez dakizun. Lehena, hileroko hitzordua euskal kantagintzarekin eta Anje Duhalderekin, Lagun Artean Kantari saioan. Apirilaren 25ean, iluntzeko 8:00etatik aurrera Kafe Antzokian, gonbidatuta zaude lagunarteko giroan kantuan ibiltzera.

Asteazkenean, berriz, dantza dugu protagonista, Euskara Ikasleen Dantzagunean. Goizez zein arratsaldez, euskal dantza errazak bezain ederrak ikasiko ditugu, eta ederto pasatu.

Eta laster, maiatzean eta ekainean zehar, musika eta dantza gehiago, hitzaldiak, zinema, Kafe Solasak… Sekulako agenda prestatu dugu euskara gehiago eta hobeto ikas dezazun, gozatzen duzun bitartean, noski!

Animo bueltan eta eskerrik asko Gabriel Aresti euskaltegia aukeratzeagatik!

Gabriel Aresti euskaltegiko bulegoan aritzeko administraria behar dugu. Interesa dutenek lanbila@gabrielaresti.com helbidera igorri dezakete curriculum-a.

Maiatzean zehar ere zuen intereseko proposamenak eskani nahi dizkizuegu ohiko eskolez gain, euskara hobeto ikasten laguntzeko.
Lehenik eta behin, mintzamena lantzeko, ahozko azterketa prestatzeko eta azken batean, euskaraz era naturalean eta gozatuz egiteko, maiatzaren 17an, asteazkena, Kafe Solasak saioan elkartuko gara berriz ere, goizez zein arratsaldez.
Egun horretan bertan, arratsaldeko 20:00etatik aurrera, Urbeltzen Dantza Ganbaran dugu hitzordua, Juan Antonio Urbeltzen eskutik dantzan egiteko saio irekian, Kafe Antzokian.
Maiatzaren 24an, asteazkena, Lagun Artean Kantari eta Anje Duhalderen txanda izango da, kantuan egiteko lagunarteko giroan. Betiko moduan, Kafe Antzokian, 20:00etatik aurrera.
Maiatzaren 26an, aldiz, Udaberri Jaia ospatuko dugu egun osoan zehar. Urtero legez, eta udarako motorrak berotzeko asmoz, lehiaketak, jolasak, bazkaria Kafe Antzokian eta hainbat sorpresa prestatu dugu Algara konpartsarekin batera.
Eta maiatzaren 27an, larunbata, Bilbo Hiria irratiak 20. urteurrena ospatuko du. Zuzeneko emanaldia egingo du Done Bikendi kaletik, eta sorpresa gehiago.

Uda ekainean hasten da

Bestalde, ez ahaztu uda ekainean hasten dela Gabriel Aresti euskaltegian, eta irailera arte ikastaro trinkoak, barnetegiak Bilbon zein Bakaikun… eskaera zabala duzue euskara ikasteko. Eta deskontuak izango dituzue gure ikasleak izateagatik edota langabezian baldin bazaudete. Informazio guztia, gure bulegoan (Done Bikendi, 2  4.solairua 48001 Bilbo. Telefonoa: 944 237 591. bulegoa@gabrielaresti.com).