Irailaren 10etik 24ra OSAKIDETZA barruko hizkuntza-eskakizunak egiaztatzeko 2. deialdian izena emateko epea zabalik dago. Deialdi honetan parte har dezakete zerbitzu aktiboan, senideak zaintzeko eszedentzian edo zerbitzu berezietan egon diren edo dauden Osakidetzako langileek, lan-harremana edozein izanda ere. Hizkuntza-eskakizun hauetako bakarrera aurkeztu daiteke: 1. HE, 2. HE, 3. HE eta 4. HE (3. HE Osakidetzako langileen erregistroan baliokidetuta egonik). Azterketa idatzia azaroaren lehen hamabostaldian izango da, ahozkoa abenduaren erdi aldean eta behin-betiko emaitzak urtarrilean argitaratuko dira. Informazio gehiago OSAKIDETZAren webgunean.

Hizkuntza-eskakizun hauek prestatzeko honako ordutegietan ikastaroak eskaintzen ditu Gabriel Aresti euskaltegiak:

8:00 – 10:00 / 10:00 – 12 / 8:00 – 12:15 / 10:00 – 14:15 / 8:00 – 13:30 / 16:00 – 18:00 / 18:00 – 20:00 / 16:00 – 20:15

Informazio gehiago gure bulegoan (Done Bikendi, 2. 4. solairua 48001 Bilbo) edo 94 423 75 91 telefonoan.

Urriaren 2ra arte HABEren diru-laguntzak eskatzeko aukera izango dute da 2014/2015 ikasturtean HABEren euskara-mailak edo horien baliokideak gainditu dituzten ikasleek.

Dirulaguntza hauek eskuratu ahal izateko lau baldintza hauek bete behar dira:

• Euskaltegi edo euskararen autoikaskuntzarako zentro homologatu batean matrikulatua egon izana 2014ko martxoaren 22tik 2015ko abuztuaren 31ra bitarteko epealdian.
• 2014/2015 ikasturtean HABEren mailaren bat edo baliokideren bat egiaztatu izana. HABEren mailak egiaztatzeko gaitasun-probei dagokienez, 2014ko bigarren deialdian edo 2015eko lehenengoan mailaren bat egiaztatu izana. 297/2010 Baliokidetza-Dekretuaren bitartez HABEren mailen baliokide diren euskara-mailak (IVAP eta Osakidetzako hizkuntza eskakizunak, EGA, Hizkuntza Eskola Ofizialak…) egiaztatutakoen kasuan, 2014ko irailaren 1etik 2015eko abuztuaren 31ra bitartean egiaztatuak.
• Beti ere, ikasleak egiaztatu duen mailari dagozkion ikasketak euskaltegi/zentroan burutu baditu azken hiru ikasturteetan zehar.
• Ikasleak berak ordaindu izana euskaltegiari/zentroari ikasketa horiei dagozkien matrikulak

Egiaztatu den maila bakoitzeko jarraian zehazten den kopurua eskura dezake gehienez ikasleak:

• HABEren 1. maila edo baliokidea:  550 euro
• HABEren 2. maila edo baliokidea:  400 euro
• HABEren 3. maila edo baliokidea:  150 euro
• HABEren 4. maila edo baliokidea:  100 euro

Informazio gehiago HABEren webgunean, ebazpen osoa (PDF) eta eskabidea sarean.

Azterketa ofizialik prestatu behar baduzu (HABE, EGA, IVAP, IRALE, Hizkuntza Eskola…), ikastaro bereziak eskaintzen ditugu urrian eta azaroan. Bi aukera dituzu Bilbon: 3 orduko ikastaroak, goizez edo arratsaldez, edo asteburuko ikastaroak, ostiral arratsaldeetan, larunbat goizetan edo bi egunetan:

Bakaikun (Nafarroa) ere azterketak prestatzeko ikastaro bereziak eskaintzen ditugu azterketa garaietan eta azaroan zehar, astebeteko barnetegiak edo asteburuetan:

* Prezio bereziak euskaltegiko ikasleentzat (galdetu bulegoan)

Matrikula gure bulegoan egin dezakezu (Done Bikendi, 2. 4.solairua 48001 Bilbo) edo online, hemen klikatuta: matrikula egin

A1, A2, B1, B2, C1… Zure euskara-maila zein den jakin nahi duzu? Dakizunez, horretarako lau hizkuntza-trebetasunak neurtu behar dira (entzumena, irakurmena, idazmena eta mintzamena). Euskaltegian lagunduko dizugu zein den zure maila diagnostikatzen, baina zeure burua kokatzen joateko, zeuk ere egin ditzakezu HABEk proposatutako proba batzuk:

A2        B1       B2

HABEko 2.azterketa-deialdia abian da. Lehen aldiz aurkezten bazara edo maiatzean eta ekainean izan zen lehen deialdian idazmen proba gainditu ez bazenuen, ulermen probak (entzumena eta irakurmena) egin beharko dituzu lehenik eta behin. Euskaltegian izango dira, urriaren 9an (ostirala) edo/eta 10ean (larunbata). Goiko koadroan ikus dezakezunez, HABE 1 azterketa egiteko urriaren 10a da aukera bakarra, goizeko 8:30ean; HABE 4 azterketaren kasuan, aldiz, ostiralean arratsaldeko 3:30ean. HABE 2 edo HABE 3 egitekotan, ostirala ala larunbata aukeratu beharko duzu, agertzen zaizun ordutegian. Behin aukeratuta, jakinarazi behar diguzu, 682 091 733 2043 telefonora* deituta edo helbide honetara idatzita: bulegoa@gabrielaresti.com

* Telefono hau kontu honetarako baino ez da erabilgarri egongo. Beste edozertarako, jarri kontaktuan gure ohiko telefonora deituta: 944 237 591

Gogotsu eta ilusioz beterik ekin diogu 2015-16 ikasturte berriari Gabriel Aresti euskaltegian. Aurten ere, ikastaro-eskaera zabala prestatu dugu euskara eroso, erraz eta disfrutatuz ikas dezazun: ordu 1 eta erdi, 2, 3, 4 eta 5 orduko klaseak, eguneroko ikastaroak edo astean 2 edo 3 egunetan, asteburuetan, autoikaskuntza…; goizeko 7:30etik gaueko 22:00etara doazen ordutegien artean hautatzeko aukera, eta urrats guztiak. Zure helburu eta beharretara egokitutako ikastaroak ditugu; azterketa ofizialak eta hizkuntza eskakizunak prestatzeko ikastaro espezifikoak ez ezik, euskara zure erritmoa ikasteko edo mintzamena solik lantzeko ikastaroak ere eskaintzen ditugu, besteak beste. Gainera, langabetuek deskontuak izango dituzte.

Halaber, eta urtero legez, ikasturte osoan zehar zure intereseko kultura programazio berezia eskaini nahi dizugu, ohiko eskoletan ikasitakoa osatzen laguntzeko asmoz eta gure kultura sakonago ezagut dezazun. Eta horrez gain, beste jarduera dinamiko batzuk, jai eta ospakizun bereziak kasu, ez dira faltako gure egutegian.

Urriko programazioa

Gabriel Aresti euskaltegiak 35 urte baino gehiago darama euskara irakasten eta euskal mundua ezagutarazten. Eta horretarako, hilero-hilero hainbat kultura proposamen eskaintzen ditugu geure ikasleek, ohiko eskolez gain, euskara era naturalean bizi eta ikasten jarrai dezaten, baita gozatu ere. Urrian eta datozen hileetan ere, beraz, musika, literatura, dantza, bertsolaritza, antzerkia, zinema, kultura ibilbideak, zenbait gairen inguruko hitzaldiak, mintzamenerako dinamikak… eskainiko dizkizugu. Hauxe da ikasturte hasiera honetako agenda oparoa:

Urriaren 7an, asteazkena, Urbeltzen Dantza Ganbarak irekiko du ikasturtea. Dantzan egiteko eta hurbiltzen den orori euskal dantzak hurbilarazteko saio irekia da hau. Edonork parte har dezakeen dantzen jaia. Ez da beharrezkoa dantzari trebea izatea, helburua ondo pasatuz  euskal dantza tradizionalarekin harremanetan hastea baita. Hori guztia Juan Antonio Urbeltzen zuzendaritzapean, berau folklorista ospetsua eta euskal dantzen ikerle nekaezina baitugu. Iluntzeko 8:00etan izango da hitzordua, Kafe Antzokian, hilero-hilero.

Bestalde, eta urtero garai honetan egiten dugun moduan, Gabriel Aresti Segurola gogoratu eta omendu nahi dugu aurten ere. Izan ere, urriaren 14an beteko dira 82 urte idazlea jaio zenetik Bilbon, eta zenbait jarduera antolatu ditugu poetaren bizitza eta lanak hobeto ezagutzeko euskara ikasten jarraitzen duzun bitartean.

Urriaren 13an, asteartea, Rafa Rueda musikariak “Gabrieli kantuz” hitzaldi musikatua ekarriko digu, goizeko 11:00etan zein arratsaldeko 18:30ean Kafe Antzokian. Horretan, idazlearen testuetan oinarrituta edo idazleak berak sortutako kanta batzuk ezagutuko ditugu.

Programazioarekin jarraituz, urriaren 14an, asteazkena, “Arestiri gorazarre” hitzaldian idazlearen bizitzan sakontzeko aukera izango dugu, Zenbat Gara elkarteko kidea den Xabier Monasteriok eskainiko digun omenaldi xumea bezain berezi honetan: bere haurtzaroa, euskara ikasten bizi izan zuen prozesua, lana, familia… Goizeko 11:00etan zein 18:30ean entzun ahalko dugu mintzaldia, Kafe Antzokian.

Eta ostiralean, urriak 16, “Arestiren Bilbo” ezagutzeko parada izango dugu, literatura ibilbide honetan zehar, Kafe Antzokitik abiatuta eta 11:00etatik aurrera. Idazlearen sorlekua, haurtzaroa, izan zituen erreferentzia intelektualak, lan aipagarrienak eta Euskaltzaindian izan zuen protagonismoa azpimarratzea du helburu ibilbide honek.

Horrezaz guztiaz gain, urriaren 21ean, asteazkena, denboraldiko lehen Lagun Artean Kantarin elkartuko gara kantuan lagunarteko giro ezin hobean egiteko Anje Duhalde musikariaren laguntzarekin. Arratsaldeko 8:00etan izango da hitzordua, Kafe Antzokian, hilero-hilero.

Eta urriaren 27an, asteartea, antzerkiaren txanda izango da. Mikel Martinezek eta Patxo Telleriak  “Desentxufatuak” antzezlan berria ekarriko digute, goizeko 10:30ean zein 18:30ean Kafe Antzokian. Oraingo honetan, bi euskara ikasle, “munduko euskaldunberririk zaharrenak” direnak, agertuko zaizkigu oholtza gainean, euren frustrazio, desio eta kexak adierazteko. Maitasun istoriorik ederrenetan bezala, euskera maite dute eta gorroto. Gorroto dutelako maite dute; maite dutelako, gorroto.”Desentxufatuak” katarsi ariketa bat da. Euskera ikasleentzat bada, jakina, euren isla (deformatua) ikusten dutelako eszenatokian. Baina euskera ikasle ez direnentzat ere bai. Euskaldun guztion isla ere badirelako bi pertsonaiok. Euskaldunok ditugun desio, kexa, eta obsesio berberak dituztelako. Eta obsesioetan, bi nagusi: euskera bera eta… bai, sexua, jakina! “Desentxufatuak”, “Euskera Sencilloaren Manifiestoa” eta “Larruaizetara” antzezlanen eszenarik onenekin osatua dago. Artifizio handirik gabe agertu nahi dute publiko aurrean, hau da, Ez Dok Hiru-ren funtsa “unplugged”, desentxufatuak alegia.

Euskaltegia baino gehiago da Gabriel Aresti, euskara bere osotasunean eskaintzen dizulako. Ez galdu aukera! Oraindik matrikulatu ez bazara, anima zaitez eta etor zaitez Gabriel Aresti euskaltegira! Informazio gehiago nahi baduzu, jo gure bulegora (Done Bikendi, 2 4.solairua 48001 Bilbo) edo dei iezaguzu: 944 237 591.

Eta gurekin ikastera animatzen bazara, ongi etorri eta mila esker!

Azterketa ofizialen garaietan, Gabriel Aresti euskaltegiak barnetegi bereziak eskaintzen ditu HABE, IVAP, IRALE edota oposaketetarako azterketetako probak prestatzeko (Justizia, Ertzaintza, Osakidetza…). Eta ikasturte honen hasieran ere, azaroan hain zuzen, astebeteko barnetegiak edo asteburuetakoak* eskainiko ditugu Bakaikun (Nafarroa).
Gainera, 5 eguneko egonaldi guztietan, eta azaroaren 9tik aurrera egingo diren asteburuetako eta 7 eguneko egonaldietan, %10eko deskontua izango duzu langabetua bazara. Eta gure ikaslea bazara jada, %50eko deskontua izango duzu (deskontuak ez dira gehigarriak). Informazio gehiago nahi izanez gero edo izena emateko, jo gure bulegora (Done Bikendi, 2. 4.solairua 48001 Bilbo).

*OHARRA: asteburuetako egonaldietarako oso leku gutxi geratzen dira. Mesedez, izena eman nahi izanez gero, jar zaitez kontaktuan gure bulegoarekin, telefonoz edo euskaltegira bertaratuta.

Katalana ikastea Bilbon posible da, urritik maiatzera arteko ikastaroa antolatu baitute Casal Bilbao eta Zenbat Gara elkarteek elkarlanean. Ikastaroa iragan astean hasi eta maiatzaren 26an bukatuko da, baina matrikula irekita dago izena emateko. Gabriel Aresti euskaltegian izango dira klaseak, astearte eta ostegunetan, 18:00etatik 20:00etara. Irakasle arituko den Francesc Agramunt-en esanetan “Oinarrizko mailatik abiatuko gara, eta erdiguneko TV3eko estandarraren ahoskera irakatsiko da, aurrerago tokian tokiko fonetika ezberdintasunei eta bestelako kontuei erreparatuko badiegu ere”.

Ikastaro osoaren salneurria 350 eurokoa izango da eta bi epetan ordaindu ahal izango da (200 euro hasieran eta beste 150 abenduan). Informazio gehiago jasotzeko eta matrikula egiteko Gabriel Aresti euskaltegiaren bulegora jo (Done Bikendi 2, 4. solairua) edo 944237591 telefonora.

Gabriel Aresti euskaltegiko ikasle izateagatik euskara ikasten lagundu ez ezik euskal kultura ezagutu eta gozatzeko aukera ere ematen dizugu. Eta azaroan hainbat izango dira proposatu nahi dizkizugun kultura ekarpenak: dantza, kantagintza, zinema… eta baita jan-edana ere.

Hilero bezala, dantzan hasiko gara, Juan Antonio Urbeltzen eskutik, Urbeltzen Dantza Ganbaran. Azaroaren 4an, asteazkena, da hitzordua, iluntzeko 8:00etatik aurrera Kafe Antzokian.

Azaroaren 9an, astelehena, Venezuela bertaratzen ekitaldiaren baitan, Kurkuluxetan elkarteko gure lagunek “Dena ez da futbola” film laburra aurkeztuko digute, 19:30ean Kafe Antzokian. Euskal eta venezuelar nazioetako haurrek egindako koprodukzioa da, eta bertan, beraien ikuspegitik begiratuta, futbolean sarritan gertatzen diren zenbait egoera azaltzen dizkigute, adiskidetasuna eta genero berdintasuna argumentuaren oinarritzat hartuta.

Azaroaren 11n, asteazkena, San Martin ospatuko dugu urtero bezala euskaltegian egun osoan zehar, Algara konpartsak antolatuta. Mintzamena modu naturalean lantzeko aukera izango da, txistorrak eta sagardoak lagunduta. Sopresak egongo dira gainera!

Hilaren 18an, asteazkena, Zine Txokoa bueltan izango dugu. Azaroan, euskal zinema ezagutzeko eta disfrutatzeko espazio honetan Euskal Harriaren ABDak ikusteko parada izango dugu, goizeko 10:15ean eta 16:15ean Kafe Antzokian. Euskal Herriko 26 zuzendari eta lantaldek eginiko beste hainbeste fantasia, beldur eta fikzio-zientziazko film laburrek osatutako film kolektiboa da Euskal Harriaren ABDak. Eta proiekzioaren ondoren, solasaldia izango da Eneko Olazabal zuzendariarekin.

Eta hilabetea bukatzeko, azaroaren 25ean euskal musikarekiko bi zita ditugu, Kafe Antzokian horiek ere bai: alde batetik, 10:30ean eta Udagoieneko Osterak antolatuta, Eñaut Elorrieta eta Mikel Markez musikariek “Baga Biga Higa” emanaldia ekarriko digute: 60ko hamarraldiaren aurreko garaietatik hasi eta gaur egunera arteko euskal musikaren historia oinarrri duen multimedia formatuko hitzaldi-kontzertua. Eta bestetik, iluntzeko 8:00etan, Lagun Artean Kantari lagunarteko giroan kantatzeko saioa ekarriko digu, hilero bezala, Anje Duhalde musikariak.

Ikasturtean zehar, hiruhilero, mintzamena lantzeko eta naturaz eta inguruaz gozatzeko asteburu-egonaldiak antolatzen ditugu Bakaikun. Dakizunez, Bilbo erdian ematen ditugun ohiko eskolez gain, motibatzen laguntzeko eta geletatik kanpo ere euskaraz bizitzeko aukera izan dezazun kultur ekarpenak (hitzaldiak, zinema, antzerkia, dantzak, kantagintza…) eskaintzen dizkizugu; jai eta ospakizunak antolatzen ditugu… Eta horretaz guztiaz gainera, asteburu zoragarriak pasatzeko parada ere eskaintzen dizugu Bakaikun dugun etxean: ostiraletik igandera, txangoak eta hainbat jarduera antolatzen ditugu mintzamena praktikatu, gure kultura gehiago ezagutu eta primeran pasa dezazun. Eta kanpoko lagunak ere anima daitezke. Lehen hiruhilekoan hau izango da data: abenduaren 11tik 13ra. Prezioa: 95 € ohean; 85 € literan. Eta Gabriel Aresti euskaltegiko ikaslea bazara, %50eko deskontua izango duzu. Informazio gehiago nahi izanez gero edo izena emateko, jo dezakezu gure bulegora (Done Bikendi, 2. 4.solairua. 48001 Bilbo) edo telefono honetara deitu: 94 423 75 91.

Abenduan gaude, eta horrek esan nahi du ospakizun eta jardueraz beteriko agenda izango dugula datozen asteetan. Hasteko, eta guk Euskararen eguna egunero ospatu eta egunero izateko hautua egin eta transmitzen ahalegintzen bagara ere, abenduaren 3an, Euskararen Nazioarteko Egunean, aprobetxatuko dugu gure nahi eta beharrrak, gure aldarriak eta pozak azpimarratzeko, eta baita euskaraz zabaltzen jarraitzeko sormenaren bidez: egun osoan zehar, ikasle eta irakasleok gure ustez diren euskarazko hitzik ederrenak partekatuko ditugu, eta horrez gain, euskaraz bizi izan dugun gertaera edo pasadizo polit bat idatzi eta erakutsiko dugu.

Halaber, abenduan ere ez da faltako dantzekin eta Juan Antonio Urbeltzekin izaten dugun hileroko hitzordua. Hilaren 9an, Kafe Antzokian, iluntzeko 8:00etatik aurrera elkartuko gara dantzazaleok, trebeak ala ez, Urbeltzen Dantza Ganbara saio irekian.

Abenduaren 10ean, aldiz, ikasleek mintzamena lantzeko aukera izango dute, hiruhilero bezala, Kafe Solasak saioan, egun osan zehar Kafe Antzokian. Oraingo honetan, “Gu, kontsumitzaile” izango dugu gaia, hau da, gure kontsumo ohiturak eta portaerak izango ditugu aztergai.

Horrez gain, abenduaren 16an, asteazkena, zinemaren txanda izango da: Zine-txokoan “Tasio” Montxo Armendarizek egin zuen lehen filma ikusteko aukera izango dute goizeko zein arratsaldeko ikasleek.

Eta egun horretan bertan, 16an, nahiz 17an, X. Truke Azoka ospatuko dugu. Eguberriak badatoz eta gure poltsikoak dardarka hasi dira. Urtaro honetan makina bat gauza erosten eta jasotzen ditugu eta gero ez ditugu inoiz erabiltzen. Zer egiten dugu arropa, liburu, jostailu hauekin? Pentsatu al duzu inoiz beste inork behar dituela edota erabil ditzakeela? Gabriel Aresti Euskaltegian eta Algara konpartsan orain urte batzuk horretaz jabetu ginen eta horregatik pentsatu genuen bi urterik behin truke azoka antolatzea. Azokan norberak jada erabiltzen ez dituen baina egoera onean dauden gauzak (liburuak, CDak, jantziak, jostailuak, elektrotresnak, irakasleak…) edota eskaini ditzakeen zerbitzuak (jatekoa eta edatekoa, masajeak, ilea moztea, musika tresnaren bat jotzea, eskua irakurtzea, argazkiak egitea…) trukatu ahal izango ditu zentimo bat ere gastatu gabe. 15ean, asteartea, tasazio eguna izango da.

Hemen ikusi ahal izango duzu gutxi gorabehera nolakoa izaten den truke azoka, aurreko urte bateko bideoan:

Eta hiruhilekoa bukatzera doanean, Euskaltegiko Jaia ospatuko dugu, abenduaren 18an, ostirala. Done Bikendin elkartuko gara poteatzeko, eta 21:00etan Kafe Antzokian afari berezia izango dugu. Jakina, sorpresak ez dira faltako. Ez galdu!

Eta 21ean gogoratu beste hitzordu bat dugula, San Tomas ospatzeko, Algara gure konpartsarekin. 23an, ostera, urteko azken Lagun Artean Kantari kanta-saio irekia izango dugu Kafe Antzokian, arratsaldeko 8:00etan, Anje Duhalderekin.

Durangoko Azoka

Bestalde, abenduaren 4tik 8ra, berriz, Durangora joango gara, 50. Euskal Liburu eta Disko Azokara. Aurten, Zenbat Gararen ekimena den Erroa argitaletxearen ekoizpen berriak izango ditugu. Horien artean, bi liburu: alde batetik Erroaren lehendabiziko nobela grafikoa, Adur Larreak marraztutako Gabriel Aresti BioGrafikoa eta, bestetik, Herrien mintzoa bildumari hasiera emango dion Beduino bat Karibe aldean, Ali Salem Iselmu idazle sahararraren Un beduino en el Caribe euskarara ekarrita. Horrez gain, Erroak bigarren diskoa argitaratuko du egunotan: D Capricho bikotearen Andrazkubak izeneko CDa. Beraz, abenduaren 4tik 8ra, pasa zaitez Durangoko Erroaren erakusmahaitik!

Zorionak, Kafe Antzokia!

Eta jakina, ezin ahaztu abenduaren 15ean izango dugun ospakizun berezi-berezia: Kafe Antzokiaren 20. urteurrena. 20 urte pasa dira jada erreferentea den kultura gune hau sortu zenetik: musika, literatura, antzerkia, hitzaldiak eta bestelako kultura-ekitaldiak… eta jakina, baita jatorduak, jaiak eta parrandak ere! Egun horretan bertan, Benito Lertxundiren kontzertua izango da Kafe Antzokian, eta abenduan zehar beste kontzertu batzuk ere izango ditugu: Zea Mays, Ruper Ordorika, Mikel Urdangarin… Kontsultatu Kafe Antzokiaren agendan.
Zorionak, Kafe Antzokia!!!

Ospakizun, gorazarre eta omenaldi eguna bihurtu da azken urteetan abenduaren 3a, eta aurten euskaldun berriei dagokie ohore hori. Euskara ikasteko egin duten ahalegina eskertzeko, euskaldun berriak izango dira protagonistak. Halere, esker onaren adierazpena ez da egun horretara mugatuko, ez: Euskal Autonomia Erkidegoko administrazioek adostutako proposamena da hiri eta herrietako kale, eraikin edo lorategiren bati euskaldun berria izena jartzea.

Ondo merezitako gorazarrea, bai horixe! Beti esan dugu herri honek zor handia duela euskara ikasi duten milaka herritarrekin. Euskara ikasteko erabakia hartu, ahaldundu eta euskaraz bizitzeko hautua egin duten 300.000 hiztun pasatxo irabazi ditu euskarak azken hamarkadetan; horietatik herenak baino gehiago heldutan gau-eskola eta euskaltegietan euskaldundu dira. Eta guztiok gara jakitun zer-nolako ahalegina eskatzen duen heldutan ikasteak: sarritan ikasteari aspaldi utzi eta berriro ohitura hartu behar, eguneko lanaldiarekin bateragarri egin behar, lagun eta sendiarekin egoteko denborari tartea kendu behar, zaletasunak pixka bat alboratu behar, bertoko hizkuntza ikasteko ordaindu behar… Ahalegin handia jende askok egin duena. Guztien izenak hemen jartzea ezinezkoa da, baina gogoan ditugu, besteak beste, Kristina, Manu, Eugenia, Elsa eta Miguel; helduaroan hasi ziren euskara ikasten. Egun, beste asko bezala, euskaraz bizi dira, eta garrantzitsua dena, bere seme-alabek etxean zein eskolan euskara dute lehen hizkuntza! Kateak ez du etenik! Euskaldun berriak euskaldun zaharrak sortzen!

Izen asko irakasleen artean ere: Miren, Ane, Patxi, Karlos, Marian, Xabi… Batzuk euskaldun zaharrak, euskaldun berriak beste batzuk, baina guztiak euskaradunak; helduen euskalduntzearen ibilbide luzea ezagutu dute. Lan boluntarioa urte luzeetan, administrazioaren aitortzarik gabe eta era prekarioan urte askotan. Urteak aurrera egin ahala, hainbat garaitan lan egoera egonkortzeko pauso batzuk eman direla ikusi dute; baina jakin badakite helduen euskalduntze eta alfabetatzea gaur-gaurkoz ez dagoela inondik inora egonkortuta eta normalizatuta. Hala ere, Euskal Herriko plazak euskaldunez betetzeko erronkari tinko eusten diote, eta etengabeko prestakuntzan murgilduta daude, eskaintza eta metodologia hobetu nahian. Irakasle horiek guztiek, eta lanean diharduten ehunka irakaslek ere, egunen batean gorazarrea eta zerbait gehiago beharko dutelakoan gaude.

Are gehiago, esango genuke ez dela nahikoa herriko plazarieuskaltegietako euskara irakaslea izena jartzearekin. Behingoagatik lana duintasunez egiteko baliabideak eskaini behar dira; horrela egingo da egoki gorazarrea. Dagoeneko ez gara konformatzen estrategikoak garela entzutearekin. Orain da unea jauzia egiteko; izan ere, Euskal Herriko administrazio nagusietan langai daude datorren urteko aurrekontuak.

Nafarroan, aldaketaren aurrekontuak izango omen dira, eta gu aldaketa esanguratsuen esperoan egon gara, aurreko egoera ahazteko modukoak eta norabide onean goazela erakutsiko digutenak. Dagoeneko ezaguna da aurrekontuen aurreproiektua, eta orain gutxi aurkeztutako proposamenean argi geratu da aurreko gobernuak izandako joera zitala eten egin dela. Ez da gutxi, baina aurrekontu proiektu hori oso urrun dago oraindik euskaltegietako lana normalizatzea lortzetik, eta ez da inondik inora gure aurreikuspenetara hurbiltzen; izan ere, 2010eko aurrekontuen parekoa da 2016rako aurkezten zaiguna.

EAEn ere egoera normalizatu batetik urrun gaude. Hainbat garaitan aurrerapausoak eman dira, baina garai horietan ere egoera egonkor eta normalizatu batera iritsi gabe. Orain, sei urteko erabateko geldialdi luzearen ondoren, esanetatik ekintzetara pasatzeko unea heldu da. Hori uste genuen, behintzat. Baina, usteak erdia ustel, 2016rako aurkeztutako aurrekontu proposamenean ez dago hobekuntzarik egiteko tarterik, ezta urrik eman ere! Nonbait, beste behin ere estrategikoak garela entzunez igaro beharko dugu datorren urtea!

Gizartearen eta administrazioen helburua bada euskara normalizazio parametroetara ekartzea eta herritarron ohiko hizkuntza izatea, asko eta asko dira euskara ez dakitelako euskaltegietatik pasatu behar dutenak, milaka. Eta guk horretan lagundu nahi dugu. Gure lanean eta horrek duen eraginean sinesten dugu. Euskaradunak sortzeko lanean jardun nahi dugu, baina nahi izatea ez da nahikoa. Sektore normalizatua izan nahi dugu, izan behar dugu; eta horretarako, berandu baino lehen, administrazioek neurriak hartu behar dituzte, pauso sendo eta finkoak eman behar dituzte. Horrela egin ezean, euskaltegietan aritutako irakasleei egindako monumentuan lore sortak eskainiko ditugu abenduaren 3an!

ARTIKULU HAU HONAKO HAUEK SINATU DUTE: Mertxe Mugika (AEK), Jon Urdangarin (Barnetegiak), Patxi Agirregomezkorta (Batuz), Isabel Isazelaia (Elkarlan) eta Gurutze Sarasola (IKA), ekimen sozialeko euskaltegien izenean.

EGA edo Euskarazko Gaitasun Agiria eskuratzeko azterketaren 2016ko lehenengo deialdia otsailean hasiko da eta matrikulaldia urtarrilaren 7tik 21era izango da, bi egunak barne. Lehen proba, atariko proba alegia, otsailaren 20an, larunbata, izango da. Urte berriko zure asmoen artean EGA lortzea baduzu, Gabriel Aresti euskaltegian azterketa prestatzeko ikastaro bereziak eskaintzen dizkizugu: egunero, astean 2 edo 3 egunetan, ostiraletan edo larunbatetan; 2, 3, 4 edo 5 ordutan… Atariko proba, idazlanak, berridazketak eta beste egiteko guztiak behar bezala lantzeko eta gainditzeko. Matrikula zaitez gure bulegoan (Done Bikendi, 2. 4.solairua 48001 Bilbo) edo hemen klikatuta.

EGA azterketara aurkezteko matrikula egiteko eta horren inguruko informazio guztia kontsultatzeko, hemen klikatu.

2016 urte berrian ere ekarri nahi dizugu eskaintza zabal baino zabalagoa euskara ikas dezazun, horregatik, hainbat maila, ordutegi eta ordu kopuru dituzu aukeratzeko. Baina horretaz gain, badakizu euskaltegia baino gehiago dela Gabriel Aresti; izan ere, euskara ikastea abiapuntu eta helburu izanda, erabilera eta motibazioa sustatzeko aukerak eman nahi dizkizugu. Hori dela eta, hilero-hilero ikasleen intereseko proposamenek osaturiko agenda eskaintzen dugu: musika, dantza, zinema, hitzaldiak… Euskararen mundua ezagutu eta euskara hobeto ikas dezazun. Hauek dira urtarrilerako prestatu ditugun kultura ekarpenak:

Hasteko, euskal dantzekiko hileroko hitzordua dugu, urtarrilaren 13an, Urbeltzen Dantza Ganbara saioan. Bertan, Juan Antonio Urbeltzen zuzendaritzapean hainbat lagun elkartzen dira, batzuk aspaldikoak, inoiz huts egin barik, baina lagun berriak ere ongietorriak izaten dira beti. Eta jakina, profesionalak izateko beharrik ez dago; dantzazalea izan eta ondo pasatzeko gogoa besterik ez da behar. Hilero bezala, zita iluntzeko 8:00etan da Kafe Antzokian.

Urtarrilaren 20an, aldiz, Jakoba Errekondok “Garaian garaikoa garaiz” hitzaldia eskainiko digu,  Argia astekariaren eskutik, 11:00etan eta 19:00etan, Kafe Antzokian. Paisajista usurbildarrak baratzezaintzari buruzko jakintza bildu du Bizi baratzea. Garaian garaikoa garaiz liburuan: modu atsegin eta ulerterrazean, baratzearen abenturan murgiltzeko grina daukatenentzat gida ezin hobea eskaintzen du lan honek, baita dagoeneko lehen urratsak eginda dituztenentzat ere.

Urtarrilaren 27an, Inun kantagileak bisitatuko gaitu. Musikari zornotzarrak gaztaro osoa darama musikari lotua. 2014ko maiatzean, bakarlari gisa eta euskaraz, pop estiloko “Berreginez” izena daraman bere lehen diskoa kaleratu zuen. Grabaketa zuzenean egin zuen, gitarra, ahotsa eta erritmo elektroniko eta akustikoak loop pedalekin konbinatuz. Eta horrez gain, hainbat musikari eta kulturagilerekin era askotako proiektuetan aritua da. Hitzaldi musikatu honetan hobeto ezagutzeko aukera izango dugu, eta bere musikarekin gozatu. Goizeko 10:30ean eta arratsaldeko 16:30ean, Kafe Antzokian.

Eta egun horretan bertan, euskal kanta klasikoak eta berriagoak abesteko abagunea izango dugu Anje Duhalde musikariaren laguntzarekin Lagun Artean Kantari hileroko saio irekian, 20:00etatik aurrera Kafe Antzokian.

Bestalde, hil honetan beste hitzaldi interesgarri batzuk izango dira Kafe Antzokian: Eider Rodriguez idazlearen “Itsasoa da bide bakarra” eta “Aho bete doinu” liburuari buruzkoa.

Espero dugu zure gustukoak izatea ekarpen hauek guztiak. Ziur gaude euskara hobeto eta arinago ikasten lagunduko dizutela behintzat, eta jakina, baita gozatzen ere. Eskerrik asko Gabriel Aresti euskaltegia aukeratzeagatik eta urte berri zoragarri eta euskaraz beterikoa izan!

Gabriel Aresti euskaltegian, ohiko eskolez gain, ikasleak motibatzen lagundu eta geletatik kanpo ere euskaraz bizitzeko aukera eman nahi diegu urte osoan: kultur ekarpenen bidez, ikasturtean zehar ospatzen ditugun jaietan, tailer eta ikastaroei esker… eta gainera, asteburu bereziak pasatzeko parada ere eskaintzen diegu Bakaikun (Nafarroa) dugun etxean: ostiraletik igandera, txangoak eta hainbat jarduera antolatzen ditugu gure ikasleek mintzamena praktikatu, inguruko paisaiaz gozatu, gure kultura gehiago ezagutu eta primeran pasatzeko. Eta kanpoko lagunak ere anima daitezke.

Bigarren hiruhilekoan hauek izango dira datak:

• Otsailaren 26tik 28ra: 9., 10., 11. eta 12. urratsak
• Martxoaren 4tik 6ra: 5., 6., 7. eta 8. urratsak
• Martxoaren 11tik 13ra: 1., 2., 3. eta 4. urratsak

Prezioa: 95 € ohean; 85 € literan. Eta Gabriel Aresti euskaltegiko ikaslea bazara, 75 € ohean; 65 € literan. Informazio gehiago nahi izanez gero edo izena emateko, jo dezakezu gure bulegora (Done Bikendi, 2. 4.solairua. 48001 Bilbo) edo telefono honetara deitu: 94 423 75 91.

Otsailean gaude jada eta horrek esan nahi du hainbat ospakizun izango ditugula datozen egunetan: San Blas eta Santa Ageda, Inauteriak… eta horrez gain, Gabriel Aresti euskaltegian hilero-hilero eskaintzen ditugun kultur ekarpen interesgarri ugari ere bai, euskara gehiago eta hobeto ikas dezazun.

Otsailaren 3an, asteazkena, San Blas eguna dugu. Opilak prestatu eta egun horretako azokak eta festak ezagutzeaz gain, ezin dugu ahaztu datorkigun beste jai garrantzitsu bat: Inauteriak edo Aratusteak. Euskal Herri osoa murgilduko da mozorro festa itzelean, eta bere esanahia, jatorria, pertsonaia eta errituak emango dizkigu ezagutzera Mikel Urbeltzek, goizeko 9:00etan eta arratsaldeko 18:30ean Kafe Antzokian.

Otsailaren 4an, berriz, Santa Ageda bezpera dugu, eta beraz, abestea tokatzen zaigu egun osoan zehar. Arratsaldeko 19:30ean, gainera, Algara konpartsarekin batera alaituko ditugu Abandoko kaleak.

Ordurako Aratusteak ospatzen hasia izango da Bilbo, eta Gabriel Aresti euskaltegian ere sekulako festa egingo dugu, urtero legez, ostiralean, otsailak 5: Inaute Jaia. Goizetik gauera arte egitarau zoragarria dugu guztiok euskaraz ederto pasa dezagun:

• 8:30ean, Torrada lehiaketa ospatuko dugu, eta txokolate goxoarekin batera gosalduko dugu indarrak hartzeko.
• 9:30ean, dantza-tailer berezia izango dugu; bertan, Inauterietan tipikoak diren euskal dantza errazak jarriko ditugu praktikan.
• 10:30 inguruan, gure Sketch lehiaketa tradizioalari emango diogu hasiera: astean zehar ikasleek prestatutako antzerki labur dibertigarriak gozatuko ditugu. Eta sari mundialak egongo dira! Aurtengo gaia: “Zerekin moztu nahi duzu…?”
• 12:30ean, sari banaketaren ostean, poteo-berriketa egingo dugu Done Bikendi kalean, musikak alaitua.
• 14:00etan, bazkaria egingo dugu Kafe Antzokian. Sarrerak salgai daude dagoeneko euskaltegiko bulegoan, 12 euroan.
• 16:00etan, kantagintza saioa izango dugu, lagunarteko giroan, gure kantak ikasi eta gozatuz.
• 17:15ean, arratsaldeko Sketch lehiaketa izango dugu.
• 18:30ean, arratsaldeko Torrada lehiaketa, askari gozoa.
• 19:30ean, poteo-berriketa egingo dugu Done Bikendin.
• Eta 21:30ean, Kafe Antzokira bueltatuko gara bukaera ederra emateko egunari, festa giroko musikaren laguntzaz dantzatzera eta primeran pasatzera.

Jakina! Ez ahaztu mozorratuta etortzea! Nola? Koloretsu jantzi: hamaika kolore jarri egunari, bizitzari! Apurtu asperdura eta tristeziarekin! Eta osagarriren bat ere ekarri: betaurrekoak, kapela, festako lepokoa… Anima zaitez!

Otsailaren 6an, larunbata, Bilboko Aratusteak ospatzen jarraituko dugu, Algara konpartsarekin. 12:00etan emango diogu irekiera Jai esparruari konpartsa guztiok, Plaza Biribilean. Eta 12:30ean Done Bikendira joango gara, Urbeltzen Dantza Ganbara saio berezira. Ondoren, Roberto, Idoia eta beste lagun trikitilariekin batera, kalejira egindo dugu Abandon zehar. 14:30ean joango gara Kafe Antzokira bazkaltzera. Eta arratsaldean, 16:00etatik aurrera, Mozorro Lehiaketan parte hartuko dugu Plaza Biribilean. Hemen duzu Bilboko Konpartsen egitarau osoa.

Baina ez pentsa! Aratusteen ostean ere beste hainbat hitzordu geratzen zaigu!

Otsailaren 10ean hileroko hitzordua izango dugu Urbeltzen Dantza Ganbara saio irekian. Bertan, Juan Antonio Urbeltzen zuzendaritzapean hainbat lagun elkartzen dira, batzuk aspaldikoak, inoiz huts egin barik, baina lagun berriak ere ongietorriak izaten dira beti. Eta jakina, profesionalak izateko beharrik ez dago; dantzazalea izan eta ondo pasatzeko gogoa besterik ez da behar. Beti bezala, hitzordua Kafe Antzokian da, arratsaldeko 8:00etan.

Otsailaren 13an, larunbatetan ikasten duten ikasleek ere kultur ekarpenen bidez ikasteko aukera izango dute, oraingo honetan Hiromi Yoshida Japoniako hizkuntzalari euskaldun eta Axen Eskalada, Arantzazu Maiz eta Maider Ibarguren aktoreekin. Japonian tradizio handia duen rakugoa zer den azaldu eta antzeztu egingo digute, hurrenez hurren. Rakugoak Japoniako ipuin barregarriak eta laburrak dira, eta egun honetan ezagutzeko eta gozatzeko aukera izango dute ikasleek, eguerdiko 12:30ean Kafe Antzokian.

Otsailaren 16an, asteartea, antzerkiaren txanda izango da: Gilkitxaro taldeak  Adarretatik zintzilik antzezlana ekarriko digu. 40 urte bete berri duten bi pertsonaia krisian bizi dira: bitokekiderik ez, seme-alabarik ez, autorik ez, hipotekarik ez… Mundu honetakoak ote dira ala adarretatik zintzilik bizi dira? Adarretatik zintzilik komedia da, eta baita kronika nostalgikoa ere. Ziria noraino sartu diguten konturatzeko berrogei urte bete behar izan dute batzuek. Goizeko 11:00etan eta arratsaldeko 19:00etan ikusi ahalko dugu Kafe Antzokian.

Otsailaren 24an, asteazkena, Euskal Herriko itsas ondareaz eta horrek etorkizuneko proiektuetan izan dezakeen garrantziaz arituko dira Jon Maia eta Albaola Itsas Kultur Faktoria goizeko 11:00etan eta 19:00etan. Euskal Herritik Ternuara joan eta bertan 1565ean hondoratutako San Juan baleontziaren erreplika eraikitzen ari dira Pasaian.

Eta egun horretan bertan, 20:00etan, Lagun Artean Kantarin dugu zita. Kantuan egiteko Zenbat Garak antolatzen duen saio irekia dugu hau, gaurko eta lehengo kanta euskaldunak berreskuratuta lagunarteko giroan Anje Duhalderen laguntzarekin.

Hizkuntza bat behar bezala ikasteko, hizkuntza horretan murgildu eta zuzeneko harremanetan ibili behar dugu hiztunekin ohiko komunikazio egoeretan. Gabriel Aresti euskaltegiaren barnetegiek horretarako aukera paregabea ematen dute Sakana eta Urbasa artean kokatuta dagoen eta era guztietako zerbitzuez ondo hornituta dagoen baserri eder batean, udan, azterketak prestatzeko egonaldi berezietan urte osoan zehar eta baita Aste Santuan eta Pazko astean ere. Hainbat aukera eskaintzen dizkizugu aurtengo Aste Santuko oporraldian: 13, 10, 8 edo 5 eguneko barnetegiak, azterketa ofizialak prestatzeko, ikasturtean zehar ikasitakoa errepasatzeko,  mintzamena lantzeko… Barnetegietan, euskara-eskolak jaso eta euskara bertatik bertara bizitzeaz gain, euskal kultura ezagutzeko balio duten hainbat txango, bisitaldi gidatu eta jarduera egingo dituzu. 4. mailatik gorako ikaslea bazara, anima zaitez!

Eta Bilbon geratu eta zure etxean lo egin nahiago baduzu, Bilboko barnetegia ere eskaintzen dugu martxoaren 29tik apirilaren 2ra, Bakaikun diren eskola eta jarduera guztiekin (8:30etik 18:30era) baina loa etxean, eta bazkariak Kafe Antzokian izaten dira eta prezioaren barruan daude.

Bestalde, Gabriel Aresti euskaltegiko ikaslea bazara, prezio bereziak izango dituzu, eta kasu horretan matrikula bulegoan egin beharko duzu.

Hemen dituzu datak eta prezioak:

Gabriel Aresti euskaltegiko ikasleentzako prezio bereziak hauek dira:

Zalantzarik izanez gero, edo matrikula egiteko, jo gure bulegora (Done Bikendi, 2-4. solairua 48001 Bilbo).

Zoritxarreko eguna dugu gaur Zenbat Gara elkartean. Gaur goizaldean zendu da Bilbo Hiria irratiko lankide eta lagun Mieltxo Monfort Aiestaran, 62 urte zituela. Sortzez hernaniarra, baina aspaldi Bilbon errotutakoa zen Monfort, ikasle garaitik, EHUko kazetaritza fakultateko lehenengoetako lizentziatua izanik. Bere ahotsa izan zen bere lan tresna, bikoizketa eta lokuzio lanetan hasi baitzen, hasieran K2000 estudioan eta, ondoren, 1997tik hona, Bilbo Hiria irratian. Berari erabat lotua izan da gure irratiaren ibilbidea, bera izan baita urteotan irrati honen motor nagusia. Izugarri nabarituko dugu denok bere falta. Adiorik ez, Mieltxo. Gugan eta uhinetan izango zara beti.

Egunak luzatzen doaz, negua laster bukatuko den seinale. Baina urtaroa edozein delarik ere, Gabriel Aresti euskaltegian ikasleentzako programazio berezia antolatu nahi dugu urte osoan zehar, hilero-hilero, euskara gozatuz eta gure kultura ezagutuz ederto ikas dezazuen. Horrela, datozen asteetan, mintzamena, zinema, dantza, musika eta euskaltegiko jaia ditugu gure agendan. Ezer falta ez dadin!

Martxoaren 8an, Emakumeen Nazioarteko Egunean, hausnarketarako abagunea izango dugu aurten ere, Kafe Solasak saioan. Sexismoa identifikatu eta deuseztatzeko asmoz, gure gizartean eta gure egunerokotasunean izaten ditugun jokaerak aztertuko ditugu.

Martxoaren 9an, asteazkena, arratsaldeko 8:00etan, Kafe Antzokian, hileroko hitzordua izango dugu Urbeltzen Dantza Ganbara saio irekian. Bertan, Juan Antonio Urbeltzen zuzendaritzapean hainbat lagun elkartzen dira, batzuk aspaldikoak, inoiz huts egin barik, baina lagun berriak ere ongietorriak izaten dira beti. Eta jakina, profesionalak izateko beharrik ez dago; dantzazalea izan eta ondo pasatzeko gogoa besterik ez da behar.

Martxoaren 12an, larunbata, Igor Elortza eta Andoni Egaña bertsolariek eguerdiko 13:00etan saio didaktikoa eskainiko diete larunbatetan iksten duten ikasleei. Ondoren, 14:30ean, bertso bazkaria izango dugu Kafe Antzokian, goiko aretoan.

Martxoaren 15ean, asteartea, ikasleek Mursego Eibarko artista bertatik bertara ezagutzeko aukera izango dute, hitz eta kantuen bidez. Hitzordua 11:00etan izango da, Kafe Antzokian.

Martxoaren 18an, ostirala,  hiruhilekoa oraindik bukatu ez bada ere, euskaltegiko jaia ospatuko dugu. Sarrerak salgai daude dagoeneko bulegoan (13 eurotan). Arratsaldeko 7:30ean elkartuko gara Done Bikendi kalean poteoan eta berriketan ibiltzeko, eta festa girotzen hasteko. Eta 21:30ean afaria izango dugu Kafe Antzokian. Betiko moduan, hainbat jolas eta sorpresa prestatu ditugu ederto pasa dezazuen euskaraz modu naturalean egin bitartean. Laster gehiago kontatuko dizuegu.

Eta oporretan joan baino lehen, Lagun Artean Kantarin dugu zita, martxoaren 22an, asteartea, iluntzeko 8:00etan. Kantuan egiteko Zenbat Garak antolatzen duen saio irekia dugu hau, gaurko eta lehengo kanta euskaldunak berreskuratuta lagunarteko giroan Anje Duhalderen laguntzarekin.

Oporretatik bueltan gara jada, hirugarren hiruhilekoari ekiteko prest. Azken txanpa honetan HABEko azterketak izango ditugu, baita EGA azterketaren azken probak eta IVAP-HAEEko hizkuntza eskakizunak egiaztatzeko azterketa ere, besteak beste. Gabriel Aresti euskaltegian, proba horiek guztiak prestatzen lagunduko dizugu. Eta horretarako, ohiko eskolez gain, zuregan pentsatutako kultura agenda ere eskaintzen dizugu, zure ikaste prozesua osatu eta zure motibazioan laguntzeko asmoz. Izan ere, gure 35 urte baino gehiagoko esperientziari esker badakigu hilero-hilero eskaintzen dizkizugun kultura zein ludikotasun proposamen horiek euskara hobeto eta azkarrago ikasten eta azterketak behar bezala prestatzen lagunduko dizutela.

Ondo hasteko, apirilaren 4an, astelehena, Andoni Egaña bertsolariak eta Xabier Lizaso piano-jotzaileak bisitatuko gaituzte, “Garai Hura Gara” ikuskizuna eskaintzeko. Musikan, Lizasok Larrañaga, Gamarra eta Osinaga konpositoreen musika ekarriko du, baita Peñaflorida Kondearen hainbat obra jo ere. Andoni Egaña bertsolariak, berriz, Fernando Amezketarraren lana ekarriko du gogora. Goizeko 11:00etan eta arratsaldeko 19:00etan izango dira Kafe Antzokian.

Apirilaren 6an, aldiz, Urbeltzen Dantza Ganbara dantza saio irekira gaude gonbidatuta. Juan Antonio Urbeltzen laguntzarekin, edonork parte har dezake hilero Kafe Antzokian izaten dugun saio honetan, 20:00etatik aurrera.

Izan ere, dantzak euskal kulturaren oso osagai garrantzitsuak dira, belaunaldiz belaunaldi urte eta mendeetan zehar gorde direnak. Gure jai, ospakizun eta hainbat momenturekin daude lotuta, eta horregatik, euskara ikasten duzun bitartean, ezagutarazi eta gozarazi nahi dizkizugu: apirilaren 13an, asteazkena, lehen urratsetako ikasleek euskal dantza erraz eta atsegingarriak ikasteko aukera izango dute, egun osoan zehar, Euskara ikasleen dantzagunean.

Apirilaren 20an, berriz, zinemaren txanda izango da. Euskal zinema ezagutzeko eta disfrutatzeko Zine-txokoan Javier Rebollok eta Alvar Gordejuelak zuzendutako “Txarriboda” filma (2015) ikusiko dugu oraingo honetan Kafe Antzokian, goizeko 10:15ean eta arratsaldeko 16:15ean. Anbizio handiko Fran enpresari gazteak arriskuan ikusten du bere aberastasuna, senar-emazteen arteko arazoengatik, eta emaztea paretik kentzeko plan konplexu bat taxutzen du. Berak ez dakiena da Klarari egin beharko diola aurre. Klara serieko hiltzaileetan espezializatutako polizia da, eta arrazoi oso pertsonalak ditu emakumeen hiltzaileei jazartzeko.

Eta hilari amaiera emateko, Anje Duhalde eta euskal kantagintzarekin izango dugu hitzordua, Lagun Artean Kantari saio irekian, apirilaren 27an, asteazkena, hilero bezala 20:00etatik aurrera Kafe Antzokian.

Euskara ikasi eta gozatu Gabriel Aresti euskaltegian!